(UPDATE) OFW nga iloy sang mga bata nga naanod sang baha sa Batad, nag-abot na sa Iloilo

By: Aine Grace Bravo | December 26, 2019

via Dave Bucayan

Batad, Iloilo — Naka-abot na sa Iloilo si Mrs. Andrea De Asis, ang iloy sang mga bata nga naanod sang pagbaha sa Barangay Pasayan, Batad kahapon sang kaagahon, Disyembre 25.

Daw sa indi gihapon makapati si Andrea sa nadangatan sang iya bana nga si Roel kag tatlo ka mga bata nga lunsay menor-de-edad. Mabuot kag wala sang isaway si Andrea sa iya mga bata.

Una nga nakita kahapon ang lawas ni Yanyan, tatlo ka tuig, antes nakita ang bangkay ni Roel kag ila isa pa ka bata nga si Meme, 15 anyos. Nagapabilin nga missing si Moymoy, 10 ka tuig.

Hulaton ni Andrea nga makita ang bangkay ni Moymoy antes tingub nga dal-on sa ila balay sa Barotac Nuevo ang iya mag-amay.

Nagbakasyon lang sa Barangay Pasayan ang magpamilya bangud napatay ang amay ni Roel, samtang natalana kuntani magbalik si Andrea sa Kuwait kaina sang hapon pero nagdesisyon nga indi na magdayon kag nagbalik sa Iloilo kaina sang kaagahon.

Nabilin sa Barotac Nuevo ang duha pa ka bata sang mag-asawa nga naga-edad 19 kag 16 anyos.