ILECO III, target balikan sang elektrisidad ang pila ka parte sang Balasan, Batad, Carles kag Estancia antes ang Disyembre 31; Normal operation, ginalauman mabalik sa Enero 15, 2020 – ILECO III GM

By: JoMaque | Disyembre 29, 2019, 8:35am

Iloilo – Nagabuligay ang nagkalain-lain nga electric cooperatives kag private entities agud mapabalik ang elektrisidad sa ginabanta 29,000 consumers sa Northern Iloilo nga pinakanahalitan sang Bagyo Ursula.

Suno kay ILECO III General Manager Consorcia Peñaranda, wala gid sang elektrisidad sa Balasan, Batad, Carles kag Estancia bangud padayon ang ila pagkay-o sang naguba nga mga poste, mga wires kag iban pa nga facilidad.

Posible suno sa iya nga mabalikan nila sang power ang iban nga lugar sa gintumod nga mga banwa antes ang Disyembre 31. Samtang ginalauman nga mabalik sa normal ang tanan nga operasyon sa Enero 15, 2020.

Nagabulig sa ILECO III sa pagkay-o sang naguba nga mga poste kag linya ang task forces sang ILECO II, Central Negros Electric Cooperative, Inc. (CENECO), Negros Occidental Electric Cooperative (NOCECO) kag private entities pareho sang PECO kag MORE Electric and Power Corp.

Maabot man ang team sang electric cooperative halin sa Zamboanga.

Una na nga nabalik ang power sa Sara Substation na naga-suply sa Sara, Concepion, San Dionisio, Ajuy, kag Lemery.

Halos wala naman na-apektuhan ang Substation nga naga-supply sa Barotac Viejo, Anilao kag Banate.