10 ka tuig nga bata sang pamilya De Asis nga naanod sang tubig-baha sa paglaslas sang bagyo Ursula sa Batad, nakita na

By: JoMaque | Disyembre 30, 2019, 9:40am

Batad, Iloilo – Nakita na ang 10 ka tuig nga bata sang pamilya De Asis nga si Roel De Asis Jr. alyas Moymoy nga naanod sa baha sang Disyembre 25 sang nagpanalasa ang Bagyo Ursula.

Las 9:30 kahapon sang aga, Disyembre 29, sang nakita ang bangkay ni Moymoy sa suba sa boundary sang Barangay Drancalan kag Batad Viejo.

Suno kay Barangay Tanod Charry Pacardo, natampukan sang mga hilamon, uhot kag kawayan ang bangkay ni Moymoy.

Dugang pa niya nga kon indi paghawanan ang mga nakatampok kay Moymoy, indi siya makita.

Isa pa ka Barangay ang ma-agyan halin sa Barangay Pasayan, pakadto sa lugar sa diin nakit-an si Moymoy, suno kay Pacardo.

Sang Disyembre 25, las 5:00 sang kaagahon, nagtuyo nga mag-evacuate ang magpamilya sang hinali lang nagtaas ang lebel sang tubig baha kag naanod sila.

Una nga nakita ang bangkay sang amay nga si Roel De Asis, 41-anyos, kag bata niya nga kanday Rosa Mae “Meme” De Asis, 15-anyos kag Yanyan De Asis, 3 ka tuig.