DOH 6, nagkumpirmar nga may isa na ka kaso sang COVID-19 sa Western Visayas nga halin sa Bacolod City kag may travel history sa London

By: Aine Grace Bravo| via DOH

NEG. OCC. , March 21, 2020 — Ginkumpirmar sang Department of Health Western Visayas Center for Health Development ang labing una nga kaso sang COVID-19 sa Western Visayas.

Suno kay DOH 6 Director Marlyn Convocar, ang nagpositibo sa COVID-19, Filipino nga 56 anyos kag may travel history sa United Kingdom.

Nag-abot sa Pilipinas ang lalaki sang Pebrero 29 subong nga tuig, Marso 2 siya sang nakabatyag sang sore throat kag nabudlayan sa pagginhawa kag gin-admit sa ospital sang Marso 6.

Marso 13 sang ginkuhaan siya sang swab samples kag ginpadala sa Research Institute for Tropical Medicine sang pareho nga adlaw.

Nag-abot kahapon ang resulta nga nagakumpirmar nga positibo ang pasyente sa SARS-CoV 2, ang virus nga nagadala sang COVID-19.

Ginkumpirmar naman ni Bacolod City Mayor Evelio Leonardia nga taga-Bacolod City ang amo nga pasyente.

Suno kay Aksyon Ann Defensor sang Aksyon Radyo Bacolod, gin-anunsyar ni sang ila alkalde sa iya ginpatawag nga urgent press conference kahapon.