1st COVID-19 case sa Iloilo City, estable ang condition sa ospital – DOH 6

By: Khenjo Terco | Via Aksyon Radyo Iloilo

Iloilo City (UPDATE) – Estable ang kondisyon sang 61-anyos nga babaye nga una nga kaso sang coronavirus disease (COVID-19) sa Iloilo City.

Ini ang ginkumpirmar ni Dr. Mary Jane Juanico, head sang Infectious Diseases Section sang Department of Health (DOH) 6.

Ang pasyente ang ika-tatlo nga kaso sang COVID-19 sa Western Visayas.

Marso 8 sang ginhilanat, gin-ubo kag nagpalakit ang lawas sang pasyente kag Marso 16 sang na-admit sa ospital. Kahapon sang hapon (Marso 24), nakumpirmar nga positibo siya sa COVID-19.

May travel history sa Manila ang pasyente, dugang pa ni Juanico.

Naka-confine sa pribado nga ospital sa siyudad ang pasyente.

Nagbalibad si Juanico nga ibuyagyag ang identity, kag kon taga-diin ang pasyente nga na-admit sa pribado nga ospital sa siyudad sang Iloilo.

Padayon ang contact tracing sang health authorities sang siyudad sa mga nagka-contact sa pasyente. Sa Western Visayas, may apat na ka kumpirmado nga kaso sang COVID-19; (1)  56-anyos nga lalaki halin sa Bacolod City nga may travel history sa London; (2) 65-anyos nga lalaki, halin sa Guimbal, Iloilo nga may contact sa pamilya nga may travel history abroad; (3) 61-anyos nga babaye sa Iloilo City nga may travel history sa Manila; (4) 45-anyos nga lalaki halin sa Jamindan, Capiz nga may travel history sa Manila.