Iloilo City Mayor Jerry Treñas, nagpa-andam nga kuhaan poder nga manghatag sang pagkaun ang mga punong barangay nga nagapili sang hatagan sang food assistance

By: Aine Grace Bravo via Hotline

ILOILO CITY, March 26, 2020 — Nagpaandam si Iloilo City Mayor Jerry Treñas nga iya kuhaan sang poder nga managtag sang pagkaun ang mga punong barangay sa siyudad nga nagapili lang sang ila ginahatagan sang pagkaun.

Kasunod ini sang nakalab-ut nga impormasyon sa alkalde nga may isa ukon duha ka kapitan sa siyudad nga nagapili lang sang ila ginahatagan. 

Ginkuhaan na sang poder sa pagpanagtag sang pagkaun ang amo nga mga kapitan suno sa alkalde kag ginpangitaan naman sang pamaagi sang city government nga makapanghatag sa tanan nga mga residente sang wala gintumod nga mga barangay.

Nagbalibad ang alkalde nga hingadlan ang duha ka kapitan.

Ang pagkaun nga ginahatag sa mga residente ginaluto sa community kitchen sa kada barangay bilang bulig sang gobyerno kag halin sa mga donasyon nga nabaton sang city government para sa mga pumuluyo nga naapektuhan sang ginapatuman nga enhanced community quarantine bangud sang coronavirus disease.

Ginmanduan man sang alkalde ang mga kapitan nga ihatag na ang mga gin-download sa barangay nga mga bulig bangud madamo pa suno sa iya ang mga inughatag pa sang city government.