DOLE, magahatag sang financial assistance sa mga trabahador nga nadulaan sang trabaho bangud sa COVID-19

By: Aine Grace Bravo | via Hotline

ILOILO CITY, March 27, 2020 — Ginahingyo sang Department of Labor and Employment (DOLE) ang mga employers sang mga nadulaan sang trabaho ukon na-apektuhan sang flexible working arrangement nga ginpatuman bangud sang COVID-19 nga mag-apply sa COVID-19 Adjustment Measures Program (CAMP) para sa ila mga empleyado.

Sa CAMP, makabaton sang P5,000 nga financial assistance ang empleyado sang kompaniya ukon establisemento nga apektado sang pila ka mga measures nga ginpatuman bangud sang COVID-19 threat.

Ginpabutyag ni DOLE6 Information Officer Niezel Sabrido nga wala sang dapat kabalak-an ang mga employers bangud sa gobyerno magahalin ang cash nga pwede ma-avail sang mga empleyado.

Wala sang deadline sa application suno kay Sabrido apang kinahanglan sang empleyado nga maghingagaw sa pag-apply bangud naka-depende sa availability sang pondo ang mangin benepisyaryo sang programa.

Sa Western Visayas may P62 million pesos nga budget nga gina-process ang DOLE agud i-release sa mga nag-apply sa programa.