Kadiwa on Wheels mobile markets, masugod na baligya sang preska nga ulutanon sa kabaranggayan sang Iloilo City

By: Aine Grace Bravo | via Facebook

ILOILO CITY, March 28, 2020 — Mahimo na magbakal sang preska nga utanon sa guwa lang sang ila balay ang mga residente sa siyudad sang Iloilo sugod sa masunod nga semana paagi sa “Kadiwa on Wheels.”

Suno kay Maria Teresa Solis, chief sang Department of Agriculture Agribusiness and Marketing Assistance Division, joint initiative ini sang DA Western Visayas kag Iloilo City Government sa tuyo nga mahatagan sang pagkaun nga may nutrisyon ang publiko. Magahatag man ini suno sa iya sang marketing opportunities sa mga mangunguma.

Madamo nga mangunguma ang nabudlayan sa pag-dispose sang ila produkto bangud sang istrikto nga quarantine measures nga ginapatuman sang mga local government units.

Ang mga farmers associations kag cooperatives nga naga-operate sang Bayanihan Tipon Centers sang DA-KOICA kag Rice Processing Centers halin sa nagkalain-lain nga probinsiya amo ang magadumala sang mobile markets sa mga areas nga i-identify naman ni Local Economic Enterprise Office chief Ariel Castañeda.

Ang Kadiwa on Wheels maga-operate sang tatlo ka beses kada semana.

Gin-issuehan sang food pass kag foodlane pass ang 3, 533 ka mga mangunguma sa rehiyon nga nagapahanugot sa ila nga mabiyahe ang ila mga produkto.