COVID-19 patient sa Lambunao, Iloilo, napatay sa ospital; pamilya sang napatay, gina-quarantine na

By: Aine Grace Bravo | via Aljohn Torreta

LAMBUNAO, Ilo., March 30, 2020 — Napatay si Western Visayas #16 COVID-19 patient nga na-admit sa Western Visayas Medical Center.

Ini ang ginkumpirmar ni Dr. Mary Jane Juanico, head sang Infectious Disease Section sa Department of Health 6.

Suno kay Dr. Juanico, nakabaton sila sang impormasyon nga napatay si Western Visayas number 16 kagab-i, Marso 29. Ginahulat pa ang kopya sang death certificate agud mahibaluan ang gintunaan sang kamatayon sang pasyente.

Si WV #16, 70-anyos sang Lambunao nga wala sang history of travel. Gina-verify pa sang DOH 6 ang history of exposure sang pasyente nga may Chronic Obstructive Pulmonary Disease kag diabetes.

Nagahimo na sang contact tracing ang Lambunao LGU kag ginpa-qurantine man ang mga miembro sang pamilya sang pasyente.

Bangud sini, duha na ka mga COVID-19 patients sa Western Visayas ang napatay. Una na gin-anunsyar sang DOH 6 nga napatay si WV #11 sang Marso 21. Si WV #11 ang 72-anyos nga pumuluyo sa Iloilo City ang may Acute Respiratory Distress Syndrome kag community-acquired pneumonia – high risk.