Mga PUMs kag PUIs nga ginpatenir sa Iloilo Central Elem. School, nagbakwit sa Diamond Jubilee Hall; DepEd, nag-athag nga wala nila ginpahalin ang mga PUMs kag PUIs sa eskwelahan

By: JoMaque | Abril 2, 2020

Iloilo City — Nagbakwit sa Diamond Jubilee Hall kahapon sang hapon, Abril 1 ang mga persons under monitoring kag persons under investigation halin sa Iloilo Central Elementary School.

Duha ka PUMs kag anum ka PUIs ang ginsaylo sa Jubilee hall.

Antes ginsaylo, gin-set up sa Jubilee Hall ang mga tents kag folding beds nga halin naman sa City Disaster Risk Reduction and Management Office.

Ang Jubilee Hall maka-akomodar sang tubtub sa 24 ka mga PUIs kag PUMs.

Una diri, nag-ugtas si Iloilo City Mayor Jerry Treñas bangud indi magamit ang mga eskwelahan kun wala sang Memorandum of Agreement.

 Kasunod ini sang disappointment sang alkalde sa Department of Education sa kadamuon sang requirements agud mahimo nga isolation facility ang mga eskwelahan sa tunga sang COVID-19 outbreak.         

Ginpahayag ni Treñas nga batunon na lang sang City Government ang tanyag sang UI Phinma ukon Sta. Maria Catholic School kag ipangsaylo ang gina-isolate nga mga persons under investigation kag persons under monitoring halin sa Iloilo Central Elementary School.