JO1 nga nagpositibo sa COVID-19, ginpa-idalum sa COVID-19 test bangud isa siya sa mga frontliners sang BJMP –BJMP Spokesperson

By: JoMaque | Abril 28, 2020

Iloilo City – Isa sa mga fronliners sang Bureau of Jail Management and Penology (BJMP) 6 ang JO1 nga nagpositibo sa coronavirus disease (COVID-19) nga taga- Zarraga.

Suno kay BJMP Spokesperson Jail Supt. Gilbert Peremne, ini ang rason nga ginpaidalom sa COVID-19 test ang JO1. Abril 20 sang ginkuhaan sang swab ang 20 ka mga personnel lakip ang JO1.

Ang JO1 suno kay Peremne, ang naga-maneho sang salakyan sang BJMP agud magdul-ong sang mga supplies kag PPEs sa mga jail facilities sa Western Visayas.

Sang Abril 25, may duha ka salakyan ang BJMP 6 nga nagpadulong sa Guimbal kag Culasi, Antique kag isa sa mga drivers ang JO1 agud mag-deliver sang mga supplies.

Sa amo man nga adlaw, ginpahibalo sang Western Visayas Medical Center ang BJMP nga nagpositibo sa COVID-19 ang JO1.

Yara na sa Culasi, Antique ang mga personnel sang ginpahibalo may kaangtanan sa test result sang JO1 gani ginmanduan sila nga gilayon magbalik sa Iloilo City.

Gin-ako ni Peremne nga naghapit sa Barbaza, Antique ang mga personnel agud magpanyaga, pero gin-athag niya nga wala nakapanaug sa salakyan ang JO1. Las-4:30 sang hapon sang nakabalik sa Iloilo City ang personnel kag gilayon nga gin-isolate ang JO1 kag iya mga upod.

Gilayon man nga naghimo sang contact tracing sa mga nagka-contact sa pasyente. Base sa record suno kay Peremne, 91 ka mga personnel ang gin-quarantine.

Sa amo nga numero, 54 personnel ang naka-quarantine sa regional office kag naka-home quarantine naman ang iban pa.

I-subject sa COVID-19 test ang mga nagka-close contact sa pasyente.

Posible suno kay Peremne nga nakuha sang JO1 ang virus sa iya matag-adlaw nga exposure pero padayon pa nila ini nga gina-usisa.