Negros Occidental governor, nag-request sa DOTr nga indi anay pagpasugtan ang inter-island trips –Iloilo City Mayor Treñas

By: JoMaque | May 16, 2020

Nakaplastar na ang guidelines sang Iloilo City Government sa pagpa-idalum sa syudad sa General Community Quarantine sugod subong nga adlaw, Mayo 16.

Lakip sa ginpasugtan sa GCQ suno kay Iloilo City Mayor Jerry Treñas ang pagbiyahe na sang RORO vessels kag fast crafts halin Iloilo pa-Negros Island vice versa.

Pero gin-inform si Treñas nga nag-request si Negros Occidental Governor Eugenio Jose “Bong” Lacson sa Department of Transportation (DOTr) nga indi anay pagpasugtan ang inter-island nga biyahe.

Nagahulat pa si Mayor Treñas sa desisyon sang DOTr. Base sa guidelines sang national Inter-Agency Task Force, ginapasugtan ang inter-island trips halin sa GCQ tubtob GCQ areas.