2 crew sang fishing vessel sa syudad sang Iloilo, nagpositibo sa COVID-19; Iban pa nga mga crew members, ‘naka-lockdown’ – DOH6

By: JoMaque | May 18, 2020

Iloilo City – Duha sa 18 ka mga crew sang fishing vessel sa Iloilo ang nagpositibo sa COVID-19.

Suno kay Dr. Ma. Sophia Pulmones, kanday WV102 kag WV103 ang crew sang fishing vessel nga naghalin sa Navotas City sang Mayo 10 kag nag-abot sa syudad sang Mayo 11.

Mayo 15 sang nakumpirmar nga nagpositibo si WV102, ang 38 anyos nga lalaki nga taga-Hinigaran, Negros Occidental.

Subong nga adlaw (Mayo 17) naman nakumpirmar nga positibo man si WV103, 34 anyos nga lalaki nga taga Alimodian.

Na-admit sa ospital si WV102 bangud sang hilanat kag ubo samtang yara sa gihapon sa fishing vessel si WV103 upod sa 16 ka iban pa nga mga crew as of 4:00 PM subong nga adlaw (Mayo 17).

Wala sang sintomas nga nabatyagan si WV103.

Naka-angkorahe malapit sa Tanza, City Proper ang fishing vessel.

Gin-subject na sa RT PCR test ang 18 tanan ka mga crew.

Samtang wala pa nadesisyunan kun sayluhon sa lain nga pasilidad ang nagpositibo ukon ang iban pa gid nga mga crew members, ‘naka-lockdown’ ukon indi sila anay mahimo makahalin sa fishing vessel suno kay Dr. Pulmones.

Antes gindala sa ospital si WV102, wala nakapanaug sa fishing vessel ang 18 ka mga crew members.