Kapin 60 ka mga jeepney units sa Iloilo City, nakakuha na sang permit, car pass, fare matrix sa LTFRB

By: JoMaque | May 18, 2020

Iloilo City — Kapin 60 na ka mga jeepney units sa Iloilo City ang nakakuha sang special permit, car pass kag fare matrix halin sa Land Transportation Franchising and Regulatory Board (LTFRB) 6.

Suno kay LTFRB 6 Director Richard Osmeña, pwede na makasugod byahe ang mga units.

Ginalauman nga madugangan pa ini bwas bangud madamo pa ang nagahikot sang mga requirements.

Tatlo ang requirements nga ginapangayu sang LTFRB agud mahatagan sang permit, car pass kag fare matrix ang mga units.

Dapat suno sa iya nga i-sumiter ang OR-CR; updated ang insurance kag may certification halin sa kooperatiba. Gin-athag ni Osmeña nga dapat miyembro sang kooperatiba ang tag-iya sang units agud makakuha sang permit, car pass kag fare matrix.

Kaina, wala nadayon ang pagbyahe sang mga traditional jeepneys bangud wala nakakuha sang nasambit nga kinahanglanon halin sa LTFRB.

Magluwas sa siyudad, madamo naman sang mga units ang ginapasugtan na sang ahensiya nga makabyahe sa probinsiya sang Iloilo.

Sa record nila, ang mga operators halin sa Pavia, Tubungan, Pototan kag Passi City pa lang ang naka-comply sang mga requirements.