Mga LSIs, i-subject lang sa rapid antibody-based test pag-abot sa Western Visayas -DOH6

By: JoMaque | June 12, 2020

Iloilo City (UPDATE) — I-subject lang sa rapid antibody-based test ang mga Locally Stranded Individuals pag-abot sa Western Visayas.

Ini ang ginkumpirmar ni Department of Health 6 Director Marlyn Convocar base man sa nahisugtan sang mga gobernador sa rehiyon sa ila sinapol kahapon.

Suno naman kay Dr. Mary Jane Juanico sang DOH6, kinahanglan mag-home quarantine sang 14 diyas sang mga LSIs.

I-subject naman sila sa RT PCR test kun ma-obserbahan nga may sintomas sang COVID-19 kasubong sang pag-ubo kag hilanat.

Ang RT PCR test ang ‘gold standard’ para mahibaluan kun ang indibidwal may COVID-19.

Suno kay Dr. Juanico, importante nga pabaskugon ang surveillance sa mga Influenza-like Illness kag Severe Acute Respiratory Illness sa mga komunidad bangud symptom-based ang ila assessment sa pag-conduct sang RT PCR test.

Sa una nga pahayag sang DOH6, mahimo ma-subject sa RT PCR test ang mga LSIs ilabe na ang mga naghalin sa mga lugar nga may madamo nga mga kaso sang COVID-19 apang ‘least priority’ lang sila.