7 ka nagsulod sa Concepcion, Iloilo halin sa Negros Occidental nga wala koordinasyon, negatibo sa COVID-19; pagpasaka sang kaso, wala gindayon –Mayor Banias

By: JoMaque | August 4, 2020

CONCEPCION, ILOILO – Nagnegatibo sa COVID-19 ang pito nga halin sa Negros Occidental nga nagsulod sa Concepcion, Iloilo.

Ginkumpirmar ini ni Concepcion Mayor Raul Banias sang nagguwa ang resulta sang RT PCR test sang Sabado, Agosto 1.

Una na ginpabutyag ni Mayor Banias nga gin-abisuhan sang Municipal Health Officer ang pito nga indi magsulod sa banwa bangud wala sang koordinasyon kag wala man sang letter of acceptance halin sa banwa. Pero nakibot ang LGU sang gin-inform nga nag-abot ang pito sakay sa SUV.

Ginpahayag pa ni Banias nga nagkonsulta siya sa abogado kag chief of police sang banwa kag nadesisyunan ang pagpasaka sang kaso nga Disobedience to Agent of Person in Authority.

Isa sa ila suno kay Banias, nagpalab-ut sang mensahe sa iya nga nagapangayu sang pasaylo kag nag-ako sang ila sala.

Bangud negatibo ang resulta sang RT-PCR test sang pito, gilayon nga nakig-angot ang alkalde sa staff sang MHO, MDRRMO kag chief of police kag nadesisyunan nga indi na mag-file sang kaso bilang human consideration.

Sa baylo, ginpa-render sang Community Service ang pito kag pagkatapos sini, pabalikon sila sa Negros Occidental.

Liwat nag-apelar ang alkalde sa pumuluyo nga mag-kooperar sa ila ginapatuman nga health protocols agud malikawan ang paglapta sang COVID-19.