OB ER, delivery room, kag 2 wards sa WVMC, gin-lockdown sang nagpositibo sa COVID-19 ang nagbun-ag nga pasyente

By: Aine Grace Bravo/Aljohn Torreta

ILOILO CITY, August 4, 2020 — Gin-lockdown ang OB Emergency Room, delivery room, kag duha pa ka wards sa Western Visayas Medical Center sugod kahapon, Agosto 3, pagkatapos nagpositibo sa COVID-19 ang nagbun-ag nga pasyente.

Suno kay Dr. Joseph Dean Nicolo, medical center chief sang ospital, Hulyo 31 sang gindala sa ospital ang 42 anyos nga manugbun-ag nga pasyente nga taga-Mandurriao.

Gin-swab siya pagkatapos bun-ag kag gindala sa OB ward.

Kahapon, Agosto 3, nagguwa ang resulta nga positibo siya sa COVID-19.

Nagapadayon pa ang imbestigasyon agud mahibaluan ang source sang iya infection.

Nahamtang sa isa lang ka building ang mga pasilidad nga gin-lockdown.

Kinahanglan mag-agi sa OB ward kun magkadto sa GEO ward kag isa lang ka set sang mga doctors ang naga-duty sa amo nga mga areas.

Ginabanta 100 ka mga pasyente, bantay kag hospital personnel ang naka-lockdown kag subject sa risk assessment.

Nagabaton ang WVMC sang mga manugbun-ag nga pasyente sa separado nga area, apang kun ‘extreme emergency’ lang.

Posible matapos na buwas, Agosto 5, ang disinfection sa OB ER.