2 patay, 3 pilason sang nadisgrasya ang fire truck sa Sibalom, Antique

By: JoMaque | August 19, 2020

Sibalom, Antique — Nadisgrasya sa Sitio Bato, Brgy. Salvacion, Sibalom ang fire truck sang banwa las 10:00 kaina sang aga.

Sa inisyal nga impormasyon halin kay Police Major Rex Farren, hepe sang Sibalom Police Station, duha ang patay kag tatlo ang pilason sa aksidente.

Pakadto (and not “pabalik na” as earlier reported) sa Villafont Elementary School para sa Brigada Eskwela ang firetruck sang nadulaan sang kontrol ang driver sa kurbada nga parte sang Sitio Bato.

Nakabunggo pa sa poste kag puno sang acacia ang firetruck tubtob nga nagbaliskad.

Sa interview naman sang Aksyon Radyo Iloilo kay Fire Sr Inspector Stephen Jardeleza, spokesperson sang BFP6, ginkilala niya ang mga napatay nga sanday FO2 Joy B. Ardaña (driver/operator) kag FO1 Darryl John O. Peralta.

Ang mga pilason suno kay Jardeleza amo sanday FO1 Judy Y. Baldone, FO1 Charmie Leigh F. Forro kag FO1 Rechelle J. Lustica.

Gindala sa ospital sa San Jose ang mga napilasan pero pagadal-un sa ospital sa siyudad sang Iloilo.

Base sa incident report nga gin-file ni Sibalom Municipal Fire Marshal, SFO3 Alenel Cuayson, “malfunctioned brake” ang rason sang aksidente.