Pagdakup sa PUV drivers nga wala nakasuksok sang face shield ukon nagpasakay sang pasahero nga wala sang face shield, ginpa-iway sang LTO 6

By: Aine Grace Bravo

ILOILO CITY, September 2, 2020 — Ginpa-iway sang LTO 6 ang pagdakup sa mga drivers sang depasahero nga salakyan nga wala nakasuksok sang face shield ukon nagpasakay sang pasahero nga wala sang face shield.

Ginkumpirmar ini ni LTO 6 Assistant Regional Director Atty. Gaudioso Geduspan.

Gin-inform kahapon, Setyembre 1, ni Geduspan si LTO 6 Director Eric Tabaldo nga may resolution ang Iloilo City Council nga naga-request sa ahensya nga i-defer ang pagpangdakup bangud madihon ang Konseho sang ordinansa may kaangtanan sa pagsuksok sang face shield.

Ginpahayag ni Councilor Romel Duron, chairman sang Committee on Transportation sa Konseho, nga madihon sila sang ordinansa sa diin ibutang ang community service nga penalidad.

Una na nga gin-kwestyun ni Duron kun ngaa gin-charge sang LTO nga reckless driving ang violation sa mandu sang Department of Transportation nga magsuksok sang face shield sa public transport.

Bisan naman nga i-defer sang LTO 6 ang pagpangdakup, gina-encourage gihapon suno kay Geduspan ang pumuluyo nga magsuksok sang shield bangud kabahin ini sang health protocol agud malikawan ang COVID-19. | via Firingline