9-anyos nga bata nga babaye nga nabungguan sang multicab sa Jaro kag ginkabig nga COVID-19 suspect sang doktor sa WVMC, negatibo ang resulta sang RT PCR test

By: JoMaque | Setyembre 15, 2020

Iloilo City (UPDATE) — Negatibo ang resulta sang RT PCR test kay Aleah Reynz Fruelda, ang 9 anyos nga bata nga babaye nga nabungguan sang multicab kag ginkabig nga suspect case sa COVID-19 sang gindala sa Western Visayas Medical Center.

Ini ang ginkumpirmar ni Mrs. Emma Agodilos, iloy ni Aleah base man sa kopya sang RT PCR test result nga ginkuha niya sa WVMC.

Gin-ako ni Agodilos nga nagalalain siya sang nahibaluan nga negatibo sa COVID-19 ang iya bata apang nagpabutyag nga wala na sila sang may mahimo bangud gin-cremate na ang iya bata.

Naga-apelar ang iloy nga kuntani dal-on lang sa Emergency Room para sa Non-COVID ang mga pasyente nga non-COVID.

Ginkwestyon sang iloy ang tagdumalahan sang WVMC bangud gindala si Aleah sa ER for COVID bisan pa wala sang kaangtanan sa COVID ang pagdala sa ospital sa iya bata.

Suno kay Mr. Richard Saltin, designated spokesperson sang WVMC para sa COVID-19 response, gindala si Aleah sa ER for COVID base man sa assessment sang doctor sa iya kag bangud malapit ang amo nga pasilidad sa resuscitation area sang ospital.

Ginpamangkot sang Aksyon Radyo Iloilo kun ano ang detalye sa assessment sang doctor nga nagdesisyon sa pagdala kay Aleah sa ER for COVID apang indi makahatag si Saltin.