Guimaras Provincial Government, nagpagguwa sang EO 70 para sa ‘new normal’ guidelines sa probinsya

By: JoMaque | Oktubre 20, 2020

Nag-issue sang ‘new normal’ guidelines ang probinsya sang Guimaras.

Suno kay Vice governor John Eduard Gando, nagpagguwa sang Executive Order 70 si Governor Samuel Gumarin para sa bag-o nga mga polisa sa new normal sa probinsya sang Guimaras sugod Oktubre 14.

May pagbag-o sa policies, partikular sa mga inbound kag outbound travel sang mga residente kag bisita, suno kay Gando.

Kun sang una, ang makasulod lang sa probinsya amo ang mga nagatrabaho, may emergency kag may delivery sang basic services, pwede na subong makasulod bisan sa ano nga rasun, lakip ang tourism purposes. Isa man ini ka pamaagi, suno kay Gando, nga mabuksan ang probinsya sa mga bisita.

Pero kun may mga sintomas sang COVID-19, kinahanglan magpakita sang medical certificate.

Ipatuman gihapon, base sa bag-o nga EO, ang inbound kag outbound pass kag health declaration card, santu sa Provincial Ordinance No. 2020-04.

Ang EO, may policy sa Rapid Diagnostic Test for COVID-19 bangud ginatun-an sang probinsya ang prevalence sang COVID-19 sa mga commuters kag population groups ilabe na sa mga pasyente kada bulan. Gin-athag ni Gando nga ginatun-an pa ini kag nakadepende pa sa ila respondents, kag posible ipatuman sa Nobyembre.

Nabutang sa EO 70 nga ginapahanuugutan ang mga business establishments nga magbukas halin 4am-8pm; samtang, ang sea transport magabiyahe halin 4am-7pm. Wala naman sang restriction sa pagbiyahe sang public land transport.

Ang mga establishments naman nga nagaserbe sang makahulubog nga ilimnon, ginalimit lang sa 50% capacity agud ma-obserbar ang physical distancing.

10pm-5am naman ang curfew sa mga minor sa probinsya. | via Aksyon Farrah Mae Morano