Bangkay, nasapwan sa Banuyao, La Paz

Iloilo City — Nakita sa kahilamunan nga may tubig ang bangkay sa coastal road nga sakop sang Banuyao, La Paz las siete subong nga aga.

Nakit-an ang bangkay sang nagpanangkong ang tatlo ka mga residente sa lugar.

Ginsunod sang tatlo ang ginhalinan sang naga-usbong nga baho tubtob nakita nila nga may natabunan sang hilamon kabangdanan ila gintusluk-tuslok asta nga may naglusot nga tiil.

Lalaki ang bangkay kag gin-identify sang iya pamilya nga si Mark Henry Alpasan nga gin-report nga missing sang Nobyembre 24 kag residente sang Concepcion, City Proper.

Gilayon naghilibi-un ang utod ni Mark Henry sang nakilala ang sweat shirt nga ginasuksok sang bangkay.

Suno kay Nerissa Alpasan, ginbakal niya ang sweat shirt sang nagkadto siya sa Boracay kag ginpangayo ini sang iya utod.

Suno sa utod, pareho sa sweat shirt nga suksok sang iya utod sang ulihi siya nakita ang suksok sang bangkay nga nasapwan.