“Ginpahog niya ko nga patyon” – 16-anyos nga dalagita nga nagreklamo nga ginlugos sang iya magulang sa Barotac Viejo

By: Aine Grace Bravo | December 2, 2020

BAROTAC VIEJO, Iloilo — “Indi na ko kaagwanta sang ginahimo ni Toto.”

Ini ang rason suno sa 16-anyos nga dalagita sa Barotac Viejo kun ngaa nanugid siya sa iya magulang nga babaye nga ginlugos siya sang ila subang nga lalaki nga si Toto, 39-anyos.

Ginpahayag ni Em-em nga una siya ginhimuslan sang Oktubre 17 kag nasundan sang duha pa ka beses—ang pinaka-ulihi natabu sang Nobyembre 27.

Natabu ini suno kay Em-em sa kamalig sang iya magulang nga ara man lang sa likod sang ila balay.

Suno sa dalagita, ginpahog siya nga patyon sang magulang kabangdanan wala siya una nanugid.

Agot si Em-em sa 12 ka mag-ulutod.

Ginkumpirmar naman ni Kapitan Steve Arante nga nagdangop sa iya si Em-em upod ang iya mga magulang nga babaye sang Nobyembre 27 kabangdanan nakig-angut sila sa pulis pero nakapalagyo na si Toto sang ginkadtuan sa ila balay.

Luyag ni Em-em nga mapreso gid ang iya magulang.

Ginpahayag ni Kagawad Aner Borja nga nag-text si Toto sa iya mga utod subong nga aga nga nagapangayo sang patawad.

Suno naman sa iloy sang mag-utod, luyag niya nga ipapreso ang iya subang agud makamarasmas sa iya ginhimo.

Ginlaragway man sang iloy si Toto nga maalwan, mabuot kag matinahuron kun indi maka-inom pero kun makatomar sang makahulubog nga ilimnon, masami sini nga ginabuyayaw ang iya mga utod. | via Aksyon Hotline