Passing rate sang mga salakyan nga nagpa-test sa para sa Motor Vehicle Inspection System sa Roxas City, Capiz, yara sa 80%
ROXAS CITY, Capiz — Mataas ang passing rate sang mga salakyan nga nagpa-inspect para sa Motor Vehicle Inspection System sa inspection center sa Roxas City, Capiz.
Suno kay Judith Azarcon, presidente sang Panay Quality Motors Services, Incorporated, yara sa 80 percent ang ila passing rate samtang 12 tubtob 15 percent naman ang failing rate sa kabug-usan nga mga salakyan nga gin-test. Nagsugod operate ang inspection center sang Enero 4, 2021.
Kalabanan sa mga salakyan nga nadala sa failing rate ang wala nakapasar sa brake kag headlight test, dugang ni Azarcon.
Kun may ma-fail sa isa lang ka inspection point, hatagan gid ang salakyan sang failing rate bangud kinahanglan nga makapasar ini sa masobra 60 ka mga inspection points.
PRE-INSPECTION
Ginpahayag man ni Azarcon nga may pre-inspection sila nga ginahimo antes magsulod sa final inspection.
Gina-check nila ang salakyan sa visual inspection kag kun may makita suno kay Azarcon nga problema, ginapanugyanan nila ang mga drivers nga ipakay-o anay antes ipa-inspect sa machine para indi ma-fail sa final inspection.
Gin-athag man niya nga wala sang bayad sa pre-inspection.
MISCONCEPTIONS
Gindugang pa niya nga indi man matuod nga indi makapasar sa inspection ang mga salakyan nga naga-edad sang masobra 10 ka tuig kag isa lang ini sa mga “misconceptions.”
Sa pagkamatuod suno sa iya madamo nga mga salakyan nga nakapasar sa test bisan masobra 10 ka tuig ang edad.
Suno sa iya, wala sang pagsulundan nga indi makapasar kun daan ang salakyan bangud naka-depende ang resulta sang inpection sa pagmentinar sang salakyan.
Daku ang tsansa suno sa iya nga makapasar ang salakyan kun maayo ang pagmentinar sini.
Gin-ako man niya nga madamo nga mga tricycle drivers ang nahadlok nga magpa-test sa ila salakyan bangud posible nga indi makapasar.
Bangud sini, ginhaylo sila ni Azarcon nga magpa-test bangud man importante ang safety sang mga motorista kag mga pasahero.
