Iloilo City Councilor Romel Duron, indi kontento sa sabat sang representative sang LTO6 sa ginpatawag nga consultative meeting may kaangtanan sa pagpatuman sang MVIS

Iloilo City—Indi kontento si Councilor Romel Duron, chairman sang Committee on Transportation, Energy and Public Utilities sa City Council sa sabat ni Atty. Allan Sacramento, head sang enforcement division kag spokesperson sang Land Transportation Office (LTO) sa ginpatawag nga consultative meeting kaina sang aga may kaangtanan sa implementasyon sang motor vehicle inspection system (MVIS).

Suno kay Duron, indi pa handa ang taga-LTO sa pagpatuman sang MVIS bangud indi makasabat sang insakto si Sacramento sang ginpamangkot may kaangtanan sa pagpanukot sang P1,800 kag iban pa nga balayran.

Ginpahayag ni Duron nga dapat mahibaluan ni Sacramento ang sabat sa iya pamangkot bangud sila ang naga-implementar sang laye.

Ginpabutyag ni Duron nga kulang sa transparency ang pagpatuman sang MVIS bangud wala sang public consultation.

Dugang ni Duron, obligasyon sang taga-LTO, base sa local government code nga magpakig-angut sa LGU antes i-implementar ang laye.