Malapit 100,000 violators sang health protocols kontra COVID-19, na-apprehend sa Western Visayas

By: Aine Grace Bravo | February 11, 2021

ILOILO CITY – Naglab-ut sa 94,973 indibidwal sa Western Visayas ang gin-apprehend sang mga pulis bangud sa paglapas sa mga health protocols sa padayon nga pag-atubang sa COVID-19 pandemic.

Sa data sang Police Regional Office 6 halin Marso 2020 tubtob subong nga bulan, 72, 379 ka mga indibidwal ang ginpaandaman sang mga pulis; 22, 251 ang ginpabayad sang multa kag 343 ang gindakop.

Pagsuksok sang face mask ang nagapanguna nga ginlapas nga health protocol nga may 37,874 violators, ginasundan sang paglapas sa physical distancing nga may 26,276 violators, kag kapaslawan nga magsuksok sang face shield nga may 25,565 violators. 2,346 ang wala sang Barangay Quarantine Pass; 1,708 ang naglapas sa mga quarantine protocols, 797 ang naglapas sa mass gatherings, 234 ang naglapas sa Article 151 sang Revised Penal Code (Resistance and disobedience to a person in authority or the agents of such person), kag 173 ang naglapas sa Mandatory Reporting of Notifiable Diseases and Health Events of Public Health Concern Act.

Ginsulit naman sang Department of Health 6 nga kinahanglan ang kooperasyon sang tanan agud mapunggan ang paglapta sang COVID-19.

Suno kay Dr. Mary Jane Juanico, designated spokesperson for COVID-19 concerns sang DOH6, social responsibility ang pag-observe sang minimum health standards. –via Aljohn Torreta