Hugpong Federal Movement of the Phil, nag-ako nga sila ang nagbutang sang tarpaulin nga ‘Run Sara Run’ sa pila ka lugar sa Iloilo
ILOILO – Gin-ako sang Hugpong Federal Movement of the Philippines nga sila ang nagbutang sang tarpaulin ni Davao City Mayor Sara Duterte nga may nakasulat nga “Run Sara Run for President 2022” nga nakit-an sa 4th kag 5th district sang Iloilo.
Suno kay Billy Itchon, regional director sang Hugpong Federal Movement of the Philippines, nag-amot-amot ang ila grupo nga magpahimo sang tarpaulin bilang paghingyu kay Mayor Duterte nga magpadalagan sa pagka-presidente sa 2022.
Nakalisensiya man sila suno sa iya kay Mayor Duterte sa ila ginhimo. Dugang pa niya, wala man sila nagabutang sang tarpaulin kun indi magpasugot ang tag-iya sang duta kag indi na kinahanglan maglisensiya sa mga alkalde sang banwa kun pribado ang duta.
Gin-una lang nila butangan ang 4th kag 5th district sang Iloilo kag plano man nila butangan ang nabilin nga distrito sa probinsiya antes magsaylo sa iban pa nga probinsiya sa Western Visayas, suno pa kay Itchon.
