‘Ang akon lang ya tani, klaruhon nila ang ila nga mga rules’ — PARE Pres. Carlo Shane Eyao sa implementasyon sang MVIS
Iloilo City — Nagahingyo ang Panay Alliance of Riding Enthusiasts (PARE) sa gobyerno nga klaruhon ang mga pagsulundan sa pagpatuman sang Motor Vehicle Inspection System (MVIS) agud indi mabudlayan ang mga motorista.
Pahayag ini ni Mr. Carlo Shane Eyao, presidente sang PARE kasunod sang pahayag ni Land Transportation Office 6 designated spokesperson Atty. Allan Sacramento nga may option ang mga motorista nga magpa-test sa Private Vehicle Inspection Center (PMVIC) ukon sa Smoke Emission Testing Center.
Sa pag-intiende ni Eyao, required man gihapon nga mag-agi sa PMVIC kag nagakahulugan nga ma-doble pa ang balayran.
Gin-ako ni Eyao nga maayo ang katuyuan sang MVIS nga masigurado nga road worthy ang tanan nga salakyan.
“Ako ya personally, indi gid ako magpamalabag dira kun amo ina ang purpose nga to make sure nga tanan nga nagagamit sang kalsada, motor man, salakyan, truck, road worthy,” ang pahayag ni Eyao.
Nagapati si Eyao nga numero uno nga rason kun ngaa nagakadisgrasya ang salakyan amo nga kulang sa maintenance.
“If ever nga ang Motor Vehicle Inspection, amo ina ang magiging purpose nila kun ngaa ara sila dira, indi gid ko na ya magpamalabag. Ang akon lang ya tani, klaruhon nila ang ila nga mga rules,” dugang pa ni Eyao.
Indi man maayo suno sa iya nga sukton sang re-inspection fee ang motorista kun indi makapasar sa una nga test.
Ginpabutyag ni Eyao nga kun sa pagtan-aw nga indi makapasar ang salakyan, ipahibalo na dapat ang tag-iya.
Gin-athag ni Eyao nga bilang safety advocate, indi magpamalabag ang PARE kun ang katuyuan sang pagpatuman sang MVIS amo ang road safety bangud ini ang pinaka-importante.
Gina-ayo lang nila sa gobyerno nga kaayuhon ang implementasyon nga indi makahatag sang dugang nga galastuhan sa mga motorista.
