Mga residente sa Brgy. Agutayan, Sta. Barbara, nagpirma sang position paper agud pamatukan ang plano nga pagpatindog sang slaughterhouse sa ila lugar
Iloilo — Ginapamatukan sang mga residente sa Brgy. Agutayan, Sta. Barbara ang plano sang banwa nga magpatindog sang slaughterhouse sa ila lugar.Suno kay alyas Anna, nabutang sa ila position paper ang tatlo sila ka mga rason kun ngaa nagapamatok sila sa proyekto.
May malain nga epekto suno sa iya sa palibot kag sa ila ikaayong lawas ang baho nga magahalin sa slaughterhouse; ginabahaan ang lugar nga patindugan kag kun malab-ut sang tubig, magadala ini sang higko sa kabalayan; maapektuhan man ang suba kag mga deep well nga amo ang water source sang mga pumuluyo.
Ginakwestyun man sang mga residente kun ngaa mabakal pa gid sang lote kun may yara man sang lote nga ginbakal ang banwa sa Barangay Pungsod nga para patindugan sang ilihawan.
Ginpahayag ni Anna nga indi paborable sa banwa ang plano ilabe na subong nga may pandemya.
Suno sa iya, maayo man ang proyekto bangud kinahanglan sang banwa ang slaughterhouse apang indi lang sa Agutayan kundi sa iban lang nga barangay.
Ginsumiter sang mga residente sa Sangguniang Bayan ang ila position paper.
DUDA SA AUTHENTICITY SANG POSITION PAPER
Duda naman si Sta Barbara Municipal Administrator Atty. Leo Superio sa authenticity sang position paper sang mga residente sang Barangay Agutayan.
Ginpahayag ni Superio nga wala siya sang may nabaton nga position paper kag mangin ang opisina ni Mayor Rema Somo.
Sa iya pagkahibalo, may yara sang ginsumiter sa Sangguniang Bayan paagi kay Ex-Officio SB Member Larry Deatras.
Nagapati si Superio nga himu-himo lang sang grupo ni Deatras ang position paper bangud yara siya sa oposisyon.
Sa pihak sini, gin-athag ni Superio nga ginapamatian man nila ang concerns sang mga pumuluyo kag napaathag naman sang mga municipal officers sa ila nga wala sila sang dapat kahangaw-an sa proyekto.
Ginapanindugan ni Superio nga wala sang gasto ang banwa sa pagbakal sang lote sa Barangay Agutayan.
