Municipal Building sang Miag-ao, Iloilo, sirado sang 2 semana para sa disinfection

By: Aine Grace Bravo | February 15, 2021

MIAG-AO, Iloilo –Temporaryo nga ginsiraduhan sang 14 ka adlaw ang municipal building sang Miag-ao, Iloilo para sa disinfection.

Kasunod ini sang pagpositibo sa COVID-19 sang pila ka personnel sa munisipyo.

Suno kay Mayor Macario Napulan, nagsugod subong nga adlaw, Pebrero 15, disinfection kag magalawig tubtob Pebrero 28.

Istrikto naman nga ipatuman ang work-from-home sa iban nga empleyado.

Gin-athag sang alkalde nga magapadayon ang trabaho sang mga frontliners sa Municipal Health Office, Municipal Risk Reduction and Management Office kag General Services Office.

Base sa contact tracing, nagsugod ang pagdamo sang kaso sang COVID-19 sang nakitaan sang sintomas ang staff sang MHO, MDRRMO kag Sangguniang Bayan nga nagtambong sa birthday party sa isa ka barangay sa banwa.

Naka-duty pa sang tatlo ka adlaw sa munisipyo ang tatlo ka staff nga nagpositibo sa COVID-19.

Lain naman suno kay Napulan ang ginkadtuan nga lugar sang isa ka pulis nga nagpositibo man sa COVID-19.

‘Augmentation team’

Nagpadala naman sang augmentation team ang Iloilo Police Provincial Office sa Miag-ao MPS.

Suno kay IPPO Director PCOL Gilbert Gorero, 10 ka pulis na sa Miag-ao ang na-infect sang virus kag naka-isolate na sila sa quarantine facility sang banwa.

Ginahulat naman ang RT-PCR test result sang iban nga personnel sang police station.

Halin sa Provincial Mobile Force Company ang ginpadala nga augmentation team, suno kay PCOL Gorero. –via Mario Gelongo/Ariel Solacito