81-anyos nga lalaki sa La Paz, nasapwanga duguon ang ulo kag may black eye;Pamilya, nagapati nga ginkastigo ang ila himata

Iloilo City — Confined sa ospital ang 81-anyos nga lalaki sang nasapwan nga duguon ang ulo kag may black eye sa San Isidro, La Paz sang Pebrero 14 sang aga.

Ginkilala ang biktima kay Ramon Jayme sang Brgy. Caingin, La Paz.

Suno sa iya bata nga si Eugene Jayme Puyoc, may nakapanugid sa ila nga gindala sang nakakita nga tricycle driver ang iya amay sa West Visayas State University Medical Center agud mahatagan sang first-aide pero gindala man siya pabalik sa lugar.

Nasapwan ang tigulang nga nagasandig sa kilid sang dalan kag may bandage na sa ulo.

Wala naman sang ihibalo ang pamilya kun ano gid ang natabo kay Jayme bangud wala sang may ginbilin nga impormasyon sa ospital ang nagdala nga tricycle driver.

Ginpahayag ni Puyoc nga comatose subong ang iya amay bangud na-fracture ang ulo bangud sang paglampos sang matig-a nga bagay suno sa doktor.

Nagapati ang pamilya nga may nagkastigo sa ila amay bangud indi mangin malala ang naagum nga kasamaran ni Jayme kun nakasubsob lang siya samtang nagalakat.

Dugang pa ni Puyoc nga may nervous breakdown ang iya amay kag may tiun nga nagaguwa sa ila balay nga indi nila matalupangdan pero makatultol man siya nga magpauli. Nagapangayo-kayo sa dalan ang iya amay kag wala man nagapanggamo kun indi paghatagan.

Gin-check man sang pamilya ang CCTV footage sa lugar apang naghambal ang tag-iya nga nagabisyo-bisyo ini. Napa-blotter na ang insidente sa La Paz Police Station.

Nagapanawagan ang pamilya sa tricycle driver nga una nagdala kay Jayme nga mag-communicate sa ila agud mahibaluan kun ano gid ang natabo sa iya amay.