Western Visayas, maka-ambit man sang Sinovac COVID-19 vaccines –DOH 6

By: Aine Grace Bravo/Ariel Solacito | March 2, 2021

ILOILO CITY – Maka-ambit ang Western Visayas sang Sinovac COVID-19 vaccines nga gin-donar sang China nga nag-abot sa Pilipinas sang Pebrero 28.

Ini ang ginkumpirmar ni Dr. Mary Jane Juanico, designated spokesperson sang Department of Health 6, pero wala pa siya sang impormasyon kun pila ka doses ang makadto sa Rehiyon 6.

Sa initial nga impormasyon nga nabaton ni Juanico, sa 600,000 doses sang COVID-19 vaccines nga nabaton sang pungsod, 500,000 doses ang makadto sa DOH pero nakadepende sa ahensiya kun paano ini tungaon sa kada rehiyon.

Suno sa iya, i-prayoridad nga bakunahan ang mga frontline health care workers sa COVID-19 referral hospital sa Rehiyon 6 nga ginalakipan sang Western Visayas Medical Center sa Iloilo kag Corazon Locsin Montelibano Memorial Regional Hospital sa Negros Occidental kag isunod ang mga dalagku nga ospital.

Sa initial nga impormasyon niya, full allocation sang bakuna ang ihatag sa rehiyon sa diin para na ini sa first kag second dose sang bakunahan.

Base sa record sang DOH 6, may kapin 25,000 tubtob 27,000 ka mga health care workers halin sa Level 3 tubtob Level 1 hospitals sa rehiyon pero indi tanan ma-akomodar sang maabot nga bakuna.

Sa nasambit naman nga numero, 50 percent sa ila ang handa nga magpabakuna batok sa COVID-19. Gin-ako ni Juanico nga mataas gihapon ang “vaccine hesitancy” sa mga health care workers.

“They will miss the chance nga makabaton sang first batch sang aton nga vaccination. Kun indi sila makapabakuna now, we still do not know kun san-o naman ang next nga batch sang vaccine nga maabot sa aton,” pahayag ni Juanico sa mga indi magpabakuna.

Bangud sini, padayon ang pag-provide sang DOH 6 sang impormasyon sa bakuna kag benepisyo sini agud lubos nga mahangpan sang mga health care workers.