EA for Barangay Affairs Fernando Jose Rico , nagpa-athag kun ngaa ginkakas ang iya face mask samtang nagahambal sa madamo nga tawo sa mga barangay sa Iloilo City

By: Aine Grace Bravo/KhenJo Terco | March 24, 2021

ILOILO CITY – Gin-ako ni Executive Assistant for Barangay Affairs Fernando Jose Rico nga may kapaltahan siya sa pagkakas niya sang face mask sa ila pagkadto sa mga barangay sa siyudad para sa COVID-19 information dissemination.

Ginpa-athag ni Rico nga naglisensya man siya sa mga tawo nga ubahon niya ang iya nga face mask bangud layo man ang iya nga distansiya kag para nga mabatian siya sang maayo.

“Kay bal-an mo kagutok sang akon face mask… daw gamu-al ako kun maghambal. Pero ang akon distansiya sa (mga) tawo kag sa palibot, layo katama,” dugang pa ni Rico.

Suno pa kay Rico, na-realize niya nga sala ang iya ginhimo kag nagpasalig siya nga indi na niya pag-ubahon liwat ang iya nga face mask kun makabalik na sila pagpang-barangay matapos nga ginpa-untat ni Iloilo City Mayor Jerry Treñas.

Nagpangayo man siya sang pasaylo sa mga tawo bangud sang iya nahimo pati man sa mga nakakita sini sa social media.

Naglapta sa social media ang pictures ni Rico nga nagahambal sa atubang sang madamo nga tawo sa pagpang-barangay sang Team Uswag.

Nagpa-athag man siya nga bilang Executive Assistant for Barangay Affairs, moral obligation niya nga magkadto sa mga barangay agud magpa-intiendi sa mga tawo parte sa COVID-19 kag ang pagpabakuna para malab-ot ang 70% nga herd immunity sang populasyon sang siyudad. – via Aksyon Reports Morning Edition