Mga disposable isolation gowns, naglinapta sa higad sang karsada sa Calahunan, Mandurriao

Iloilo City — Naglinapta ang mga disposable isolation gowns sa higad sang karsada sa Barangay Calajunan, Mandurriao kahapon, Abril 20.

Suno kay Calajunan Punong Barangay Efrain Tagaytayan, nahulog sa truck ang garbage bag nga may unod nga mga disposable isolation gowns, hair net, kag disposable gloves.

Wala sang net ang likod nga bahin sang truck rason nahulog ang garbage bag.

Ang street sweeper sang barangay ang nagtipon sang naglinapta nga mga disposable isolation gowns kag nag-dispose sini sa dumpsite.Sa pagpangusisa sang kapitan, ginapatihan naghalin sa Western Visayas Medical Center ang mga basura nga ginkarga sang truck.

Dugang niya, may mga kasubong man nga basura nga naglinapta sa Oñate de Leon, Mandurriao.

Nagakabalaka si Tagaytayan para sa ila ikaayong lawas bangud sa risgo halin sa mga naglinapta nga mga basura halin sa ospital.Wala pa nakahatag sang pahayag ang WVMC angut sini.

Suno sa Centers for Disease Control and Prevention sa Estados Unidos,ang non-sterile disposable isolation gowns ang nagaka-angay nga gamiton sang mga healthcare practitioners nga naga-atipan sa mga pasyente nga suspected ukon confirmed case sang COVID-19.

Sa pagpanalawsaw naman sang Aksyon Radyo Iloilo, ginagamit ang disposable isolation gowns kun magkadto sa infectious area ukon lugar nga may mataas nga probabilidad nga matapikan sang virus nga mahimo magresulta sa balatian.

Ginatinguhaan man sang Aksyon Radyo Iloilo nga makuhaan sang pahayag ang Department of Health 6. — via Aljohn Torreta