Arevalo police, nagpatuman sang restriction sa police station matapos 4 detainees ang nagpositibo sa COVID-19

By: Aine Grace Bravo | April 23, 2021

ILOILO CITY – Temporaryo nga gin-restrict ang pagsulod sa Arevalo Police Station matapos apat sa anum ka detainees nga gin-remit sa BJMP facility sa likod sang Police Station 1 sa General Luna St., City Proper sang Abril 16, 2021 ang nagpositibo sa COVID-19.

Suno kay PCPT Chen Tañagras, hepe sang Arevalo Police Station, lunsay babaye nga detainees ang nagpositibo.

May apat ka pulis nga nagka-close contact sa mga nagpositibo kag gin-isolate na sila kag natalana i-swab.

Ang mga pulis nga natabuan may duty sa sulod sang police station ang wala na ginpagguwa.

Samtang ang mga off-duty kag natabuan nga yara sa guwa sang ginpatuman ang restriction ang wala na ginpasulod sa police station.

May instruction na, suno kay Tañagras, sa mga pulis sa guwa sang police station nga mag-standby kag amo ang magaresponder kun may mga insidente.

May gin-assign nga pulis sa guwa sang police station nga amo ang maga-akomodar sang mga reklamo.

Nagalaum si PCPT Tañagras nga negatibo lang ang mangin resulta sang swab test sa mga pulis nga close contacts sang nagpositibo nga detainees. – via Aksyon Hotline