Pulis sa Pandan, Antique, ginpreso sang nagpalupok sang M16 sang nagresponder ang iya mga kaupod nga pulis matapos nag-away sila sang iya live-in partner
Antique — Nagapabilin nga preso ang pulis sa Pandan nga nagpalupok sang pusil sang nagresponder ang iya mga kaupod nga pulis sa away nila sang iya live-in partner sa Barangay Tingib, Pandan sang Mayo 4 sang gab-i.
Ginkilala ang pulis kay PSSg Jhune Alvarez nga assigned man sa Pandan Police Station.Suno kay PLT Danny Eguis, hepe sang Pandan Police Station, nagkadto sa ila estasyunan ang iloy sang live-in-partner ni Alvarez kag nagapangayo sang assistance bangud naga-inaway ang duha.
Sa panaysayon naman sang live-in-partner ni Alvarez nga si Ann, nagsabtanay sila ni Alvarez bangud sa mahinay nga internet connection.
Ginpahayag sang babaye nga nagahampang sang online game si Alvarez gani nga naakig siya nga mahinay ang ila internet connection. Ginkadtuan ni Alvarez sa ila kwarto si Ann kag ginhambalan nga indi magtan-aw sang Youtube sa ila telebisyon tubtob nga nagbaisay sila.
Suno kay Ann, malakat na lang kuntani siya pero nagkuha sang bato si Alvarez kag ginhaboy ang windshield sang ila salakyan.
Ginkulbaan si Ann kag nagtawag sa iya iloy nga amo ang nagpangayo sang bulig sa police station.
Pag-abot naman sang nagresponder nga mga pulis, gin-istorya nila si Alvarez nga magkalma apang wala nagpamati sa ila.
Ginpabutyag ni PLT Eguis nga nagpalupok si Alvarez sang m16 samtang naga-istorya pa sa iya sanday PEMS Ranchez Barsobia kag PSMS Lilibeth Onlayao.
Gin-athag naman ni Eguis nga wala nakatuon sa duha ka pulis kag sa iya live-in partner ang pusil ni Alvarez.
Nagdalagan ang duha ka pulis upod kay Ann kag sa iloy ni Alvarez.
Napa-surrender naman sang tatlo pa ka pulis nga nabilin sa patrol car si Alvarez.
Ginkumpirmar ni PLT Eguis nga napasakaan na sang kaso kriminal si Alvarez sang Mayo 5. Wala pa siya nakapiyansa.
Gin-relieve man siya kag gin-assign sa Provincial Internal Affair Service samtang nagapadayon ang imbestigasyon.
Gin-turn over sa crime lab ang iya pusil. — with reports from Aksyon Angel Mae Ciudad
