Lalaki nga nagtuyo magpalagyo sa quarantine facility sang siyudad kag natukiban nga may withdrawal syndrome sa alcohol addiction, estable na ang kondisyon

ILOILO CITY – Estable na ang kondisyon sang lalaki nga nagtuyo magpalagyo sa quarantine facility sang siyudad sang Agosto 31 sang kaagahon.

Ini ang ginkumpirmar ni Mr. Gab Umadhay, quarantine facility manager sang siyudad.

Suno kay Mr. Umadhay, nahatagan na sang medical attention ang lalaki. Ginpaathag niya nga wala gilayon mapabulong ang pasyente bangud kinahanglan pa nila sang pahanugot sang iya pamilya.

Gin-ako ni Umadhay nga medyo nadugayan sila nga mapangita ang pamilya sang pasyente bangud indi siya residente sang Iloilo City kag madugay naman nga wala nakapakig-angot sa iya mga himata.

Kalmado na ang pasyente sa subong kag wala na nagawaras matapos nga nahatagan sang nagakigo nga pagbulong.

Matandaan nag may withdrawal syndrome sa alcohol addiction ang pasyente kag temporaryo nga gin-lock sa iya nga kwarto sang nagtuyo nga magpalagyo.

Ginpahayag man ni Umadhay nga wala na naka-lock ang kwarto sang pasyente.