Pamilya Lopez, nag-file sang counter-affidavit may kaangtanan sa Claire Diergos Case; testigo nga nag-angut sa mga Lopez sa pagpatay kay Diergos, ginbalikan sang kaso
ILOILO – Nag-file na sang counter-affidavit ang pamilya Lopez may kaangtanan sa kaso nga pagpatay kay Claire Diergos, ang babaye nga nasapwan sa gin-abandonar nga salakyan sa Brgy. Inangayan, Sta. Barbara sang Oktubre 26, 2021 sang hapon.
Ginkumpirmar ni Atty. Teofisto Melliza, isa sa mga abogado sang pamilya ni former Mayor Peter Paul Lopez, nga gin-file na nila ang counter-affidavit sa Provincial Prosecutor’s Office subong nga aga, Pebrero 10.
Si Melliza upod kay Atty. Dwight Trasadas ang mga abogado kanday former Mayor Lopez, asawa niya nga si Sally Lopez kag mga anak nga kanday Carlos Paul, Felix Paul kag Christian Paul, kag si Raffy Sorioso nga anay empleyado sang mag-asawa nga Lopez.
‘KASO VS MGA TESTIGO’
Ginkumpirmar man ni Atty. Melliza nga ma-file sila sang kaso nga perjury sa isa sa mga testigo. Gintumod sang abogado ang witness nga nagsaysay sa iya judicial affidavit nga nakita niya ang duha ka lalaki nga may ginatuwangan nga mabug-at nga bagay paguwa sa balay ni Diergos sa Deca Homes Pavia sang Oktubre 25, 2021 sang kaagahon. Gin-identify sang amo nga testigo ang duha, paagi sa mga litrato nga ginpakita sang police, nga sanday Sorioso kag Gardo Ibrahim.
Dugang ni Melliza, lakip man sa ila ginakonsiderar nga kasuhan ang mga himata ni Diergos nga nagtuad sa ila judicial affidavit nga may relasyon si Christian Paul Lopez kag si Diergos, nga nagapangaluyag si former Mayor Lopez kay Diergos.
Posible man kasuhan ang pulis nga nag-identify sa iya affidavit nga nakaagi trabaho si Ibrahim sa anay alkalde sang siya pa ang mayor sa San Dionisio, Iloilo. Suno kay Atty. Melliza, ginbutang sang pulis sa iya affidavit nga Yusuf Turabin ang isa sa mga alias ni Ibrahim. Pero ginapakita sa record sang San Dionisio LGU nga lain nga tawo sanday Turabin kag Ibrahim kag wala na nakapakig-angut sa ila si former Mayor Lopez pagkatapos nga napierde siya sa eleksyon sang 2019. – via Robert Pacardo