Update: Asawa sang security guard nga gin-report naglumpat sa baybay sa Fort San Pedro, nagapanawagan sa nakakita sa iya bana nga makig-angut sa iya ukon sa iya bata

ILOILO CITY – Nagapangayo sang bulig sa publiko si Gemma, asawa sang security guard nga gin-report naglumpat sa baybay sa Fort San Pedro mga la-una kahapon sang kaagahon, Pebrero 9.

Suno kay Gemma, wala siya nakatulog kagab-i kag nagahulat nga manuktok si Arnel nga iya bana.

Gin-ako ni Gemma nga wala gid siya magdumdom sa himuon sang iya bana. “Nanghagad siya mapa-Port [San Pedro]. Anay kay mapungko kami, gulpi lang binilin niya tsinelas niya kag dumalagan todo, naglukso sa port. Ginhambalan ko siya magtakas. Gintulok ya lang ko kag nagba-bye sa amon.”

Nakita pa ni Gemma nga naglangoy si Arnel sa mga pamalay sa General Hughes gani dali-dali man nila ginkadtuan sang iya bata. Namangkot sila sa mga pumuluyo kun may nakasaka halin sa tubig, “pero wala sila sang may nakit-an.”

Antes sini, nagkadto suno kay Gemma ang iya bana sa Central Market sang Pebrero 8 sang aga, pero nagpasugat man sang ulihi sa iya. naabtan ni Gemma ang iya bana nga nagapanugid sa retired police officer nga may mapatay sa iya pero wala man nagpanugid kun sin-o. Nagsinggitan man suno sa iya si Arnel nga nagapangayo sang bulig bangud may mapatay sa iya.

Nagapati si Gemma nga gin-atake sang nerbyos ang iya bana bangud kulang sa tulog kag stressed sa pagpaminsar sa ila pagpangabuhi. Panggab-i ang duty ni Arnel suno kay Gemma. “Kun duty, duty gid na siya, wala gid na siya nagapabaya. Wala gid siya gatulog. Tapos stressed pa gid siya sa nanay niya nga may balatian ang ugangan ko.”

Wala sang bisyo si Arnel suno kay Gemma.

“Ang ulihi ya nga nasuksok gray nga t-shirt, shorts nga blue nga may stripes nga itom. Naka-tiniil lang siya sang naglumpat. Ang kataason niya 5’4 asta 5’5. Bukod ang lawas. Bukay na ang iya buhok. May pika sa tiyan nga ‘Gemma L.’ Kag sa butkon may tattoo nga ngalan sang bata ya nga ‘Val’,” suno kay Gemma.

Sa mga nakakita kay Arnel, mahimo makig-angut kay Gemma sa cellphone numbers 09464405949 ukon 09207522466. – via Aksyon Hotline