7 ka pamatan-on nga na-identify nagpang-tripping sa mga sakay sa motorsiklo nga naglabay sa Cabugao Sur, Pavia, ginpasakaan sang kaso
ILOILO — Ginpasakaan sang kaso nga Attempted Murder may kaangtanan sa Republic Act 7610 (Special Protection of Children Against Abuse, Exploitation and Discrimination Act) kag Malicious Mischief ang pito (7) ka pamatan-on nga nagpang-tripping sa mga sakay sang motorsiklo nga naglabay sa Cabugao Sur, Pavia sang nagligad nga bulan.
Ang pito ka pamatan-on nga ginalakipan sang duha (2) ka menor-de-edad ang nakita sa viral video sa social media nga nagpanghan-os sang kawayan kag nag-tripping las 11:45 sang gab-i sang Enero 16.
Suno kay Police Major Rolando Araño, hepe sang Pavia Municipal Police Station, ginpasakaan sang kaso sang Marso 2 sanday Jericho Magallanes, 19-anyos; Franco Magallanes, 18-anyos; Rexie Kieth Tim-Tim, 23-anyos; alyas Michael, 14-anyos; alyas Kyla 17-anyos kag duha ka John Does.
Ginpanginwala ni Regie Ramirez, rider sang motorsiklo nga may daan sila nga hiligut-anon sang pihak nga grupo kag nanindugan nga indi niya kilala ang mga pamatan-on.
Suno sa iya, nakibot na lang siya sang ginhaboy sila sang bato, ginhan-usan sang kawayan kag ginlampos pa sa semento ang ila motorsiklo. — via Aksyon Cedrick Anona
