Biktima kag suspect sa shooting incident, lunsay patay sang gindala sa ospital
SANTA BARBARA, Iloilo — Patay ang lalaki nga suspect sa shooting incident sa Barangay Tuburan, Sta. Barbara kagab-i, Abril 9.
Gindala sa Western Visayas Medical Center si Jose Marco Ocampo apang gindeklarar nga napatay.
Si Ocampo ang nagtiro sa iya live-in-partner nga si Rachel Lopez nga gindala sa Mission Hospital kag gindeklarar nga dead on arrival.
Suno kay alyas John, nakita niya nga nagapundo ang salakyan kag nagabais ang biktima kag suspek. Nabatian pa niya nga nagasinggit si Lopez nga nagapangayo sang tabang.
Nagtawag sang pulis ang mga barangay officials. Pag-abot sang Sta. Barbara police agud magresponder, gintiro sang suspek ang babaye kag sunod man nga gintiro ang kapulisan.
Nagbalos tiro ang pulis kag naigo ang suspek.
Ginatinguhaan pa sang Aksyon Radyo Iloilo nga makakuha sang dugang nga impormasyon kun sa diin pa gid ang igo ni Ocampo.
Apang sa initial nga impormasyon sang mga nakakita may pilas sa tiil si Ocampo.
May pilas sa tiyan ang biktima. Sa initial nga imbestigasyon sang kapulisan, may nagluntad nga indi pag-intindihanay sa tunga sang duha tubtob nagluntad ang krimen.
Padayon ang imbestigasyon sang Sta. Barbara police.
