Menor-de-edad, pilason sang nabungguan sang salakyan ang iya ginabantayan nga milk tea store sa Sara, Iloilo

ILOILO — Pilason ang 17-anyos nga babaye sang nabungguan sang SUV nga una nabungguan sang Ceres bus, ang iya ginabantayan nga milk tea store sa Brgy. Devera, Sara mga las 11 kaina sang aga.

Ginkilala ang driver sang SUV kay Nirbhai Singh, 37-anyos nga Indian national kag taga-Roxas City.

Samtang ginkilala naman ang driver sang Ceres bus kay Herwin Bajo, 34, sang Brgy. Natividad, Barotac Viejo.

Suno kay Police Major Jose Nemias Pamplona, Chief of Police sang Sara Municipal Police Station, pareho nga nagapadulong sa Iloilo City ang direksyon sang SUV kag Ceres bus sang hinali lang nga nag-full stop ang SUV nga ginasundan sang Ceres nga nagresulta sa pagkabunggo.

Bangud sini, nagdiretso sa milk tea store ang SUV.

Detained sa Sara MPS si Singh kag si Bajo agud imbestigaran sa natabo.

Padayon nga ginabulong sa ospital ang menor-de-edad nga nakaagum sang nagkalain-lain nga pilas sa lawas.