Lalaki nga ginreklamo nagpamahog nga ipalapta ang ‘nude pictures kag videos’ sang babaye, nadakpan sa entrapment operation sa lodging house sa Molo

ILOILO CITY — Nadakpan ang 23-anyos nga lalaki sa entrapment operation sang pulis bangud sa ginpahayag “sextortion.”

Suno kay Police Executive Master Sergeant Romelo Tabuyoc, imbestigador sang Molo Police station, gindakup si alyas Ian nga taga-City proper sa sulod sang lodging house sa Molo kasunod sang reklamo ni Alyas Inday nga taga-probinsya sang Iloilo.

Marso 2022 sang nagkilalahay si Alyas Ian kag si Alyas Inday paagi sa Facebook.Ginpahayag sang babaye suno sa pulis nga antes sini, nagka-problema sila sang iya nga bana kag luyag na niya makig-bulag, rason nga nangita sang puwede i-meet-up sa social media.

Nagakinahanglan ang babaye sang kwarta suno sa pulis, rason nga nagdesisyon nga magkitaay sila ni Alyas Ian bangud nakita man niya ang “profile picture” sa Facebook.

Nag-transaksyon sila nga magkitaay sa lodging house agud makighilawas sa baylo sang kwarta.

Ginpahayag sang babaye nga ginkuhaan siya sang video kag pictures sang lalaki nga wala siya nakahibalo. Naglakat lang sila kag wala nabayaran ang babaye suno sa pulis.

Sang damlag lang, nag-text si Alyas Ian kay Inday kag ginpahog nga ipalapta ang “nude pictures kag video” kun indi siya makighilawas.

Nagpangayo sang bulig ang babaye sa pulis agud madakpan ang lalaki. Las-6 kagab-i, Mayo 11 sang nadakpan ang lalaki kag gin-detain sa Molo Police station.

Ginatinguhaan pa sang Aksyon Radyo Iloilo nga makuhaan sang statement ang arestado.