Oton to Dumangas Port nga ruta, ginbuksan na

ILOILO — Nagsugod na sa pagbiyahe ang modernized jeepneys nga may ruta halin Oton pakadto sa Dumangas Port kahapon, Hunyo 6.

Ginpahayag ni Mr. Jhun Lamasan, isa sa mga Board of Directors nga na-assign sa operation units sang modernized jeepneys, apat ka units sang modernized jeepneys ang una nga magabiyahe.

Duha diri ang iga-deploy sa Dumangas port kag duha man sa Gaisano Oton.

Ang ruta ma-agi halin sa Abilay, Oton; San Jose, San Miguel diretso sa Sta. Barbara Heights, Bangga Dama pakadto sa ruta sang Barangay Binangkilan, Sta. Barbara, diretso sa Zarraga, Bangga Bante kag diretso sa Dumangas Port kag vice versa.

Suno kay Lamasan, target sini ang mga pasahero nga halin sa Antique kag Southern Iloilo nga makadto sa Dumangas Port kag matabok pa-Bacolod City kag Negros Occidental.

Ginpahibalo man ni Lamasan nga may duha ka adlaw nga free rides ang ila mga modernized jeepneys.

Gintadlong naman ni Lamasan ang una niya nga pahayag nga maagi sa New Lucena ang ila units.

Suno kay Lamasan, sang gin-check niya ang mga ruta, maliko na lang sila sa bag-o nga karsada (Sta. Barbara-Zarraga road).

Dugang pa ni Lamasan nga posible may mga I-adjust pa sa ila operation. — with reports from Angel Mae Ciudad