Lapsag nga lalaki, nasapwan nga naga-utaw utaw sa beach resort sa Oton

OTON, ILOILO – Nasapwan sang mga bata nga nagapaligo sa baybay sa beach resort sa Brgy. Alegre, Oton ang lapsag nga nasulod sa plastic mga las-3 kahapon sang hapon, Hulyo 7.

Suno sa OIC sang resort nga si Jinky, nakit-an sang tatlo ka mga bata nga naga-utaw-utaw ang plastic sa baybay. Sang ila gin-check, nakit-an nila nga lapsag ang unod.

Ginpahayag sang mga taga-Barangay Health Workers suno kay Jinky nga ginabanta sa anum tubto pito na ka bulan ang lapsag bangud kumpleto na ang mga parte sang lawas sini. Sa ila pagpati, ginpa-abort ang lapsag bangud nga deformed na ang ulo sini kag bloated na sang nasapwan.

Dugang pa ni Jinky, posible nga naanod lang sa lugar ang lapsag. Ginpamisahan na sang police kag ginpalubong ang lapsag.