FDA Philippines, naga-imbestigar kasunod sang pag-recall sang Malta, Ireland kag France sa pila ka variants sang Lucky Me! products nga gin-manufacture sa Thailand

ILOILO CITY – Nagahimo sang imbestigasyon ang Food and Drug Administration Philippines sa Monde Nissin Philippines nga nagahimo sang Lucky Me! products.

Kasunod ini sang pag-recall sang Malta, Ireland kag France sa pila ka variants sang noodles kag pancit canton sang Lucky Me! bangud mataas ang level sang Ethylene oxide, ang chemical nga ginagamit sa paghimo sang pesticides kag disinfectants.

Gin-athag ni Ms. Angel Guzman, regional supervisor sang FDA Philippines, nga gin-manufacture sa Thailand ang mga produkto nga gin-recall sang pila ka EU countries. “Ang ila raw materials didto man sa Thailand, indi diri sa Pilipinas.”

Paathag pa ni Guzman, manubo ang maximum residue level sang Ethylene oxide nga ginapatuman sa European Union gani naga-issue sila sang warning kun may mga produkto nga nagalapaw sa requirement.

“Indi man siya gid ka daku nga epekto sa tawo pero may maximum level man na sila nga tolerable nga puwede siya. Kun sige-sige guro ang imo [pag-consume] kag magsupot sa lawas that will cause hazard sa tawo,” ang pahayag pa ni Guzman. – via Aksyon Hotline