Bill ni Sen. Padilla nga nagaduso pasugtan ang same-sex civil union ginapamatukan sang Simbahan Katoliko

ILOILO CITY — Hugot nga ginapamatukan sang Simbahan Katoliko ang same-sex marriage nga ginaduso ni Senator Robinhood Padilla.

Suno kay Monsignor Meliton Oso, Director sang Jaro Archdiocesan Social Action Center (JASAC), base sa Bibliya, ginhimo lang sang Diyos ang lalaki kag babaye.

Ginpahayag man ni Monsignor Oso nga hugot nga ginasunod sang simbahan ang Theonomous ethics.

“Magsiling ka Theonomous, governed by God under the authority of God. Ti ang authority sang Diyos, ginabase namon sa santos nga kasulatan. Ti indi gid pwede nga ako nga lalaki, mangasawa sang pareho ko nga lalaki,” ang paathag ni Monsignor Oso.

Ginpabutyag niya nga ang kasal amo ang “union” sang lalaki kag babaye agud makatukod sang pamilya. Ini man ang ginpasad sang Diyos nga institusyon sang pamilya.

Gin-ako ni Monsignor Oso nga nakibot siya nga sa tanan nga senador, si Senator Padilla pa ang nag-file sang amo nga hagda bangud sa iya nahibaluan ginadumilian sa iya relihiyon nga Islan ang same-sex union.

“Nakibot ako nga of all people siya ang nag-file sang bill. That is why nagsulod sa isip ko, religion by convenience. Nag-muslim lang siya kay basi kinahanglanon niya,” ang pahayag pa ni Oso.

Pananglitan nga mapasar nga mangin laye, indi ini pag-i-recognize sang simbahan suno kay Oso.