Asawa nga gusto makigbulag, ginbuno sang iya bana sa Calinog

ILOILO — Napilasan ang magtimbang nga kamot sang 38-anyos nga babaye sang ginbuno sang iya bana sa isa ka barangay sa Calinog.

Suno kay Police Staff Sergeant Joven Aldabon, imbestigator sang Calinog Police Station, naka-inom ang bana sang nagbaisay sila sang iya asawa.

Ginhambalan sang biktima ang iya bana nga luyag niya na nga makigbulag rason nga nagkuha sang kutsilyo ang suspek kag ginbuno siya pero nasagang sang kamot sang biktima.

Nagtambag ang manghod sang biktima pero pati siya ang ginbuno sang suspetsado.

Gindala sa ospital ang mag-utod pero nakaguwa man gilayon samtang na-aresto ang suspek.

Suno kay Aldabon, sugarol kag palahubog ang suspek rason luyag nga bulagan sang biktima.

Ginahulat sang Calinog police ang desisyon sang asawa kun bala magpasaka kaso nga attempted parricide kontra sa bana kag sa bayaw naman nga napilasan kun magpasaka sang kaso nga attempted homicide.