Pagwelga sang mga PDLs sa Iloilo District Jail sa Pototan, ginapa-imbestigaran sang DILG
Ginapa-imbestigaran sang Department of the Interior and Local Government (DILG) sa Bureau of Jail Management and Penology ang pagwelga sang masobra 100 ka persons deprived of liberty (PDLs) sa Iloilo District Jail sa Brgy. Nanga, Pototan kahapon, Agosto 24.
Sa statement nga ginpaguwa sang DILG, nagakabalaka sila sa pagsaka sang mga PDLs sa atop sang building sa sulod sang jail facility agud iprotesta ang gin-alegar nga kulang nga pagkaon kag ginapanawagan man ang pagpahalin sa warden.
“We have ordered Bureau of Jail Management and Penology (BJMP) Chief, Jail Director Allan Iral to conduct an immediate investigation on the unfortunate incident and to temporarily relieve Jail Chief Inspector Norberto Miciano (sic) from his post as jail warden to give way to an impartial investigation,” ang kabahin sang statement sang DILG.
Dugang sang ahensya, ginmanduan na si BJMP VI Regional Director JCSupt Clint Russel A. Tangeres nga pamatian ang mga concerns sang mga PDLs kag ipasiguro nga may nagakaigo sila nga pagkaon kag iban pa nga nagapanguna nga kinahanglan.
Ginpasalig sang DILG ang “humane safekeeping of PDLs in the city, district and municipal jails under our supervision.”
Padayon suno sa DILG ang ila mga pagtinguha paagi sa BJMP agud ma-improve ang mga serbisyo kag facilities kag mabuligan ang rehabilitasyon sang mga PDLs sa ila reintegration ukon pagbalik sa sosyodad.
