1-year old sa Oton nga na-cholera, nakainom sang service water sa fast food sa Iloilo City antes nagsuka kag gin-diarrhea – lola sang bata

OTON, Iloilo – Nagapati ang lola sang isa ka tuig kag walo ka bulan nga bata nga natapikan sang cholera nga ang service water sang fast food sa Iloilo City ang ginhalinan sang pagbalatian sang iya apo.

Suno kay Lovely, Agosto 18 sila nagkaon sa fast food sa City Proper area sang nagpamakal sila sang school supplies. “[August] 20 siya [ang bata] ginhilanat, mga tatlo ka adlaw. Sang 23, sang aga ginlupot siya, pagka-udto gindala siya sa Oton sa sentro. Tapos ginpuli pa di sa balay galing ang bata daw galuya na gid, amo to gindala na lang sa ospital.”

Padayon nga ginabulong sa ospital ang bata.

Ginpahayag ni Lovely nga walo sila nga nagkaon sa fast food, pero ang bata lang kag iloy niya ang naglain ang tiyan.

Ginpa-athag man ni Lovely nga nagabakal sila sang tubig ilimnon sa water refilling station sa ila barangay, samtang nagakuha sila sang tubig sa pagpanghugas, pagluto kag paglaba sa bubon. Wala suno kay Lovely sang iban pa nga miembro sang ila pamilya ukon mga kaingud balay nga nagakuha sang tubig sa bubon ang naglain ang pamatyag.

Gina-check na sang Municipal Health Office sang Oton ang source sang tubig sang pamilya agud matumod kun diin nakuha sang bata ang bacteria nga nagresulta sa iya pagka-ospital. –via Aksyon Hotline